کره کره , دایی‌یادا کره؟
دئیر کئچمیشده بیرنفر چوخ ناراحت و بئکئف اوتورموشدو, بیرنفر یاشلی بیرآغ ساققال آدام گلدی بونون یانینا سوروشدو نییه ناراحاتسان؟ دئدی: بورجوم چوخدو هامی منی تنگه توتوب دئییر بورجومو وئر منیمده یوخومدو بورجلارین وئره‌م، ایندی ناراحاتام آز قالیرام اؤزومو اؤلدوره‌م . آغ ساققال دئدی الله کریمدی چوخ ناراحات اولما من سنه بیر یول اؤیردیرم اوجور ائیله‌سن هامی سندن اَل چکر. بورجلو دئدی آی باشینا دولانیم تئز منی اویره‌ت بلکه یاخامی بونلارین الیندن قورتاریم عومور بویو سنه مینتدار اولارام. آغ ساققال دئدی: هرکس سنه نه دئسه سن دئگینن کره, هرکس هر نه سوروشسا دئگینن کره, دالیسینان سنین ایشین یوخدو ایشین اؤزو دوزه‌لر.
بورجلو بازاردا گزیردی آلاجاقلیلاردان بیری کسدی قاباقین دئدی منیم بورجومو وئر, بورجلو دئدی کره, دئدی بابا نه کره‌سی منیم بورجومو وئر, بو گئنه دئدی کره, آلاجاقلی حیرصلندی چیغیردی کیشی منیم بورجومو وئر نه کره‌سیدی, بورجلو ائله دئدی کره. بازار اهلی ییغیلدی بونلارین دؤرسینه نه اولوب؟ آلاجاقلی دئدی بومنه بورجلودی دییره‌م پولومو وئر دئیر کره.
های دوشدو بوتون آلاجاقلیلار توکولوب گلدیلر هرکس هرنه دئدی بو دئدی کره. هامیسی دئدی یاخجیسی بودو بونو آپاراق محکمه‌یه قاضینین یانینا بلکه قاضی بیزه بیر چاره یولو گؤرسه‌تدی. بونو آپاردیلار قاضینین یانینا جریانی قاضییا دئدیلر. قاضی سورشدو اوغلان بولارا بورجون وار؟ دئدی کره, قاضی هرنه سوروشدو بو دئدی کره. قاضی اؤز اؤزونه فیکیرلشدی دئدی حتمن بو آدامین بورجو چوخ اولدوقوندان چوخ فیکیر ائلییب باشینا هاوا گلیب دَلی اولوب هر زادا دئیر کره. قاضی دئدی: بو آدام دلی اولوب بونو هئچ جورم توتماز. آلاجاقلیلار دئدیلر دای دلی اولوب قانوندا دَلییه جرم وئرمز, هامی ناعیللاج قالیب سوفته باراتلاری جیردیلار ریضایت وئریب بونو بوراخیب گئتدیلر.
بورجلو گلدی او آغ ساققالی تاپدی دئدی: الله آتانی رحمت ائیله‌سین منی یامان قورتاردین هئچ کیمسیه بورجوم قالمادی سندن نه‌جور تشککور ایلییم؟
آغ ساققال دئدی: تشککور لازیم دئییل ,ایندی من سنه بیرآزدا پول وئریم گئت اوننان آل وئر ائیله اؤرونه پول قازان اونداکی پوللاندین منیم پولومو قایتارارسان. بو آدام پولو آلیب گئتدی . باشلادی آل وئر ائیله‌مه‌یه, قاباغداندا تجربه صاحیبی اولموشدو آل وئرین چَمین یاخجی بیلیردی یاخجی پول قازانج ایلییردی. بیرگون آغ ساققال گلدی بونون یانینا گؤردو بو توکان صاحیبی اولوب اؤزونه یاخجی مال دؤلت قازانیب. سلام کئف احوالدان سونرا آغ ساققال دئدی: بالا ایندی واختیدی مندن آلدیغین او بؤرجو قایتاراسان. بو دئدی کره. آغ ساققال دئدی بالا بو سؤزو من سنه اؤیره‌تشم یاخانی اؤ آلاجاقلیلاردان قورتاراسان آخی دئمدیم کی منه‌ده ایشله‌ده‌سن, بو دئدی کره, آغ ساققال گؤردو هر نه دئییر بو دئییر کره, دئدی من اولاردان دئیلم من سندن پولومو آلارام سنده گوره رسن قویروخدو یا کره دی. گئتدی دادگاها شکایت ائیله‌دی: فلان کس منه ایکی خَلوَر(بیر تن) ساری‌یاغ بورجلودو ایندی من ساری‌یاغ بورجومو ایسته‌ییره‌م او دانیر دئییر کره بورجلویام.
قاضی بو آدامی چاغیردی یانینا سوروشدو: اوغول سن بو کیشییه ایکی خَلوَر ساری‌یاغ بورجلوسان یوخسا کره؟ دئدی کره! قاضی دئدی بالا آخی کیشی دئییر ساری‌یاغ بورجلوسان! دئدی کره! قاضی اؤز توتدو آغ ساققالا دئدی بورجون ساری‌یاغ اولدوغونا شاهدین وار؟ آغ ساققال دئدی: قاضی ساغ اولسون من دای ایسته‌میره‌م بیرده بو پیس اؤزلو آدامینان اؤز اؤزه گلیم بو منیم لاپ زَحلَمی تؤکوب ائله کره قبولومدو. قاضی حکم وئردی گئت بو کیشییه مین کیلو کره آل وئر یادا مین کیلو کره نین پولون وئر.
دادگاهدان چیخدیلار آغ ساققال اؤز توتدو بورجلویا دئدی: بالا کره کره دایی دا کره؟
